3 Dane Yusup Ring Bui
3
Risampune dane Yusup kakrangkeng ring buine,
ipun kicen kuasa mangda nyaga sekancan anake sane kakrangkeng ring buine punika.
Tatkala dane Yusup kakrangkeng,
dane pada kaserahang sekancan pakaryan sane wenten ring genahe punika.
Kaceritayang mangkin,
wenten kalih pengayah raja Mesir inggih punika,
pemimpin juru inuman sareng pemimpin juru ajengan raja,
malaksana iwang kapining raja punika.
Rajane punika murka kapining ipun sareng kalih.
Punika mawinan ipun sareng kalih kakrangkeng ring genah dane Yusupe kakrangkeng.
Dane Yusup kaprentahang mangda ngayahin ipun sareng kalih.
Ipun sareng kalih kakrangkeng makudang-kudang rahina suennyane.
Kaceritayang mangkin,
rikala wengi makakalih pengayah rajane punika pada ngipi.
Ipiane punika malianan tur madue arti sane malianan.
Benjang semengane,
tatkala dane Yusup ngrauhin ipun sareng kalih,
dane nyingak ipun sareng kalih sedek sebet.
Irika raris dane Yusup mataken kapining ipun sareng kalih sapuniki,
“Jero,
kenapike jerone sareng kalih pada masemu sebet sekadi punika?”
Raris ipun sareng kalih masaur,
“Tiang sareng kalih polih ipian,
nanging nenten wenten anak sane prasida ngartiang ipiane punika.”
Raris dane Yusup matur,
“Wantah Sang Hyang Tunggal sane ngicenin kuasa mangdane anake prasida ngartiang ipian.
Durusang ja ceritayang ipian jerone suang-suang kapining titiang!”
Irika raris pemimpin juru inuman nyeritayang ipian ipune sekadi puniki,
“Ring paipian,
tiang nyingak punyan anggur,
sane macarang tiga.
Carange punika mabunga lan mabuah.
Pramangkin sekancan buah anggure punika pada tasak.
Irika tiang sedek ngisiang cangkir sang prabu,
tur tiang meres buah anggure punika ring cangkir sang prabune.
Raris cangkire punika aturang tiang ring ida sang prabu.”
Irika dane Yusup matur sapuniki,
“Jero,
sekadi puniki artin ipian jerone punika.
Makatiga carange punika maarti tigang rahina.
Malih tigang rahina puniki,
jero jagi kawaliang ring linggih jerone sane idumun.
Jero jagi ngayahin malih sang prabu dados pemimpin juru inuman idane.
Titiang nunas ring jero,
yening jero sampun kawaliang ring linggih jerone,
elingin ja titiang.
Tulungin ja titiang,
nikayang ja indik titiange ring sang prabu mangda titiang polih kabebasang saking buine puniki.
Santukan titiang kapaksa kabakta mriki saking negara anak Yahudine.
Samaliha iriki titiang nenten malaksana paindikan sane jaat,
sane ngranayang titiang pantes kakrangkeng.”
Risampune mirengin arti ipian pemimpin juru inumane punika becik,
raris pemimpin juru ajengane punika pada nyeritayang ipian ipune sekadi puniki,
“Ring paipian,
tiang sedek nyuwun penarak tatiga sane madaging ajeng-ajengan sane jaen.
Nanging kedis-kedise ngamah ajeng-ajengan punika ring duur sirah tiange.”
Raris dane Yusup matur sapuniki,
“Jero,
sekadi puniki artin ipiane punika.
Makatiga penarak punika maarti tigang rahina.
Malih tigang rahina puniki,
sang prabu jagi ngukum jero.
Sirah jerone jagi kapunggel.
Tur sawan jerone katusuk nganggen kayu sane lanying raris kagantung irika.
Samaliha kedis-kedise jagi neda sawan jerone.”
Salanturnyane malih tigang rahina,
tatkala dina wanti warsa sang raja Mesire,
ida ngaryanin pesta sane ageng sareng para pengedene irika.
Ring arepan para pengedene,
ida sang prabu ngawaliang linggih pemimpin juru inumane punika.
Nanging pemimpin juru ajengane kaukum padem,
sekadi sane sampun kanikayang oleh dane Yusup.
Nanging pemimpin juru inumane punika nenten eling kapining dane Yusup.